YAZI NGEHLELO LOKULOBOLA

Lokha isokana naliphuma ekhaya liya ebukhweni liyokuhlaba ubukhazi liphekelelwa boyise, kuragwa iinkomo zokulobola. Nabafika ebukhweni besokana:

Abomma bayangena nomlobokazi bese bamukelwa bomma balapho ngokwesiko labo.

Abo soonkomo:         Kuphuma abakhulumisi beenkomo bayokuthokoza (Bayokulotjhisa)

Abo soonkomo:         Mkhozi bakwasgedegejana (Batjho is’bongo sekhabo) bayathokoza/bayalotjhisa.

Bakwa mkhozi:          Mkhozi bakwa sgedegejana (Batjho is’bongo sekhabo) bayathokoza. (bese babuyisele ipendulo kibobaba).

Abo soonkomo:         Mkhozi size embelekweni.

Bakwa mkhozi:          Akhe siyok’bikela abobaba mkhozanami (Bayakhamba bayok’bikela abobaba bese babuyisela ipendulo)

Bakwa mkhozi:          Imbeleko ngeyethu soke mkhozi (Bese abo soonkomo babuyisela ipendulo kibobaba)

Bakwamkhozi baletha amarhajana amabili kibobaba, amarhajana la abizwa ngokuthi bo-Jojwana. Abobaba bayangena ngejarideni kodwana abayi kude nesango bese bakghuthula abojojwana ababilaba (Babakghuthulela ngemuva kwabo khona abomkhozi bangakazukubabona) bese bathi kibomkhozi:

Abo soonkomo:         Mkhozi semukwe bentwana

Bakwa mkhozi:          Abentwana ngabethu soke mkhozi. (Bakwamkhozi baletha elinye irhabha kibomkhozi bese ke abomkhozi bayalisela)

Abo soonkomo:         Mkhozi sephulwa bentwana

Bakwa mkhozi:          (Bathumela isokana lizokuthatha iintonga zabakhwenyani bese abakhwenyani balandela isokanelo, isokaneli liyobaphekelela ngendlini le ezabe bakhethelwe yona bona yindlu yabakhwenyani)

Abobaba baya ebandla bayokukhulumisana ngamalobolo bese  babawela iinkomo abeze nazo isiruba (isibaya). Ngemva kwalokho bayathathwa batjhingiswe ngendlini bese bahlatjiswa imbuzi (Mseme) Imbuzi le idliwa ekuseni ngaphambi kobana kuyokukhulunyiswa iinkomo. Umseme lo kuyindlela yokwamukela iinkomo zakwamkhozi (Zabo soonkomo). Inyongo yembuzi yomseme ithwalwa/ibotjhwa ngusoonkomo. Umkhono wembuzi le, iskhumba sayo kanye nomseme owendlalelwe usoonkomo bazokukhamba nazo ziba sibiko nabafika ekhaya. Omunye umkhono kuba ngewompheki wembuzi leyo.

Kuthi kungakhonjiswa usoonkomo imbuzakhe yomseme bese kuthathwa imvu iyokukhonjiswa abakhwenyani bese iyahlatjwa kuba sitjhebo sabakhwenyanabo abazakulala batjhetjiswe ngaso mhlokho nabalele ebukhweni besokanelo (umthathi). Imvu leyo ibizwa ngokuthi yimvabayenyana. Inyongo yemvu leyo ayisetjenziswa ngombana isitjhebo.

EKUSENI

Ngemva kokuphakululela abobaba  umratha, badla imbuzi yomseme kasoonkomo leya ahlatjiswe yona ngayizolo entambama nabafikako, kuyaphunywa ke kuyiwe esibayeni kuyokukhulunyiswa iinkomo. Bakwamkhozi bajama ngehlangothini elinye kanti nabobaba (usoonkomo kanye nabaphekeleli bakhe) nabakhwenyani bajama ngakelinye ihlangothi.

Kuthoma abobaba bakhulumise iinkomo abeze nazo. Iinkomo zikhulunyiswa ngiloyo okhethelwe ukuba ngumkhulumisinkomo. Iinkomo ngilezi ezilandelako:

1. Libherha
2. Ikonyana lebherha
3. Itjibelabherha
4. Mgada/iqaba likababa
5. Sthole sakoMisa (Ikomo yakomswa ko mntwanyana)
6. Yimbevula

Mkhulumisi nkomo     : Mkhozi nantiya ibherha (Ulikhomba ngedondolo)

Bakwa mkhozi           : Mkhozi ngisayok’bikela abobaba.

(Uyakhamba uyobabikela bese abobaba bayatjho bona bayayanela na bese babuyisa ipendulo)

Bakwa mkhozi           : Mkhozi abobaba bayathokoza.

Mkhulumisi nkomo     : Mkhozi ngisayokubikela abobaba.                

(Uyakhamba uyobabikela bona bakwamkhozi bayamukele begodu bayayanela bese uyabuya uyokukhomba elandelako)

Mkhulumisi nkomo     : Ukhomba ikomo elandelako (Njalonjalo nakilezi ezilandelako)

Kuthi abosoonkomo bangaqeda ukulobolela umkhozi, kutjhugululwa amajamo bakwamkhozi bajama lapha gade kujame khona bekhabo lesokana (bako soonkomo) kanti bekhabo lesokana bajama lapho gade kujame khona bakwamkhozi.

Bakwamkhozi bakhombisa bekhabo lesokana ingubo (Ikomo ekhule nomntwana) namawolwaphasi.

Bakwa Mkhozi           : Mkhozi nasiya ikomo ekhule nomntwana. (Uyikhomba ngedondolo)

Bako soonkomo         : Siyathokoza mkhozi. Akhe siyok’bikela abobaba mkhozi. (Bayakhamba bayok’bikela abobaba bese bayatjho bona bayayamukela begodu bayayanela na bese ubuyisela ipendulo)

Bako soonkomo         : Mkhozi abobaba bayathokoza (Nebakwamkhozi bayakhamba bayokubikela abobaba bona bako soonkomo bayamukele begodu bayanele ingubo yomntwana bese bayabuya bazokukhomba elandelako)

Bakwa mkhozi           : Mkhozi nakaya amawela phasi. (Ukhomba ngedondolo)

(Nawo abikelwa abobaba njengaleya ekhule nomntwana kubuyiselwane iimpendulo njengekuthomeni)

Bakwa mkhozi           : Mkhozi nasiya imvulela (Imvulela yikomo esengela abentwana. Ikomo leyo ikhitjhwa ngumkhozi ka soonkomo kuba yikomo yakwa mkhwenyanakhe azanande asengela kiyo abentwana ibisi. Ikomo leyo iyaragwa kukhanjwe nayo ekhabo lomkhwenyani bese uzakuthi nasele akhile umzakhe bese ukhamba nayo ngakwakhe)

Nasele baqedile ukulobolelana abakhozi, iinkomo ezimbilezi (Ekhule nomntwana (ingubomntwana) kanye namawolwaphasi) ziyahlatjwa. Lokha nazihlatjwako kuthonywa ngekomo ekhule nomntwana maqangi bese kulandelwa ngamawelaphasi, kodwana ke ngebanga lokuthelelana kwemilambo (ukwahlukana kobuhlanga) abanye bathoma ngekomo yamawelaphasi.

Inyongo yengubo (Ikomo ekhule nomntwana) ibotjhwa mlobokazi ohlatjiswako loyo kuthi inyongo yekomo yamawelaphasi ibotjhwe mkhwenyanani/isokana elithathakwelo.

UKWABIWA KWENYAMA YOBUKHAZI

Iinkomezi zahlukaniswa phakathi bese bakwamkhozi bathatha ihlangothi lekomo ekhule nomntwana nehlangothi lemvu yabayenyana. Iimfunzi zikhamba nesokana zombili neenkhumba zombili. Iinhloko zisala zombili kanye neenredlo zoke ngezabantazana bemzini loyo. Iinredlwezi aziphekwa, abentazana balapho bayazabelana nomunye athathe istokana nomunye athathe istokana ukuya ngendlela le ebaneliseka ngakhona.

Kuthathwa imihlwehlwe yeenkomo zombili bese abomkhozi bayayibambisana kanye kanye bese omunye hlangana nabo bobabili usika mbijana ngomukhwa kodwana angaphumisela, godu anikele umkhozakhe bese naye asike aphumisele (bayawuhlukaniselana). Nabasikako nje bayakhuluma bobabili bathi “mkhozi siqedile ukulobolelana, asirhelebhane ukwakhisa abentwana”. Kugawulwa imingolo eenkomeni zombili ibe mibili ekomeni ekhule nomntwana, ibe mibili ekomeni yamawelaphasi ibe mincani ifakwe eenkotlelweni ezimbili ezahlukeneko kudojwe amatjana amabili afakwe esikotlelweni ngasinye (amatjana amabili esikotlelweni ngasinye) bese kuyiwa ngentumbeni. Nakuyiwa ngentumbeni, uyise lesokana uphatha isitja esinemingodlwana emibili namatjana amabili wekomo yamawelaphasi kandi uyise likamakoti uphatha isitja lesi esinemingodlwana emibili namatjana amabili wekomo ekhule nomntwana (Ingubo).