UWILE UMUTHI WOMTHUNZI OMNANDI
UWILE UMUTHI WOMTHUNZI OMNANDI
Umtloli ngu Nsizwa Mahlangu
Ilanga: 05 Velabahlinze 2022, Isikhathi: 09:36.
Ikoro yokuzithabisa ibetheke elingophiko nelingeqiwa yintwala ngokudlula ephasini kukamakekere kezokulingisa u-Cynthia Nkosi, obekaziwa ngo-Salaminah, emdlalweni womrhatjho othi Osemsamo Limphosa Enyango. Mbala lithe lisile, lasibekela. Laduma ladlula, kwahlwa emini.
Ingorho le beyingakaphiwa kezokulingisa kwaphela, kodwana beyinebala tle. Athi ukumomotheka kuthi foco– kuvele iimfoco emihlathini kuleke nangesango lamathe phezu kwethotho lamazinywakhe amhlophe twa kuhle kwerhwaba. Baqinisile nabathi isitja esihle kasidleli. Ithando lakhe lokulingisa lathoma kusatofozela ngemva kwendlebe nefokotho isesemanzi tle.
Ngitjho nanyana bewungamnikela yiphi indima emdlalweni, bekayilima bekayiphumisele. Kezamahlaya bekasibulala ngeensini siqethuke. Emidlalweni yemrhatjhweni bekasibiza ngamagagasi womoya ukuze sithamele bekasifumbathise umnambitho wekghono lakhe lokulingisa. Indlebe nayo ithi silulu kawuzali, letha godu.
Sithe sisathamele isibandama esitjho kamnanjana ngemisebe esikhunjeni, wafika unokufa wamgola. Wanqopha kiboyisomkhulu saginya burele. Ilele ubuthongo besiphelani ingorhokazi. Ibika lomdlalo Osemsamo Limphosa Enyango lizokuhlala likeneneza eendlebeni zethu kodwana iphimbo lakhe likhambe amasolokohlo.
Kwanga ummoyakhe ungalala ngokuthula. Sibonane kwelizako. Ndlelahle Nkosi, Dlamini Lomuhle.
Oyibethileko akakayosi. Noyosileko akakayidli. Noyidlileko, udle umlandu.