Kube matlhuwo esitjhabeni samaNdebele kanye nabalandeli bezemidlalo emva kokuthi umrhatjhi weKwekwezi FM ongumakekere kezokurhatjha zemidlalo, u-Aaron “Shadow” Mbonani lokha nakalala ubuthungo basafuthi.
Azange kwamukeleka esithabeni ukuthi u Shadow uziyele kibosemkhulu. Lokhu kwenzeke ngemva kokuthi amukelwe esibhedlela se-Philadelphia, Dennilton. Ukugula kwamehlula.
UShadow Mbonani, iGanadlha leMaphotla wafika emrhatjhweni njengomkhuzeli wezemidlalo. Indima yakhe yadlulela ngale kwezemidlalo afundisa, begodu akhuthaza ngelimi nesiko lesiNdebele.
Iphimbo lekulungwana lathoma ukuzwakala emrhatjhweni usaziwa nge-Radio Ndebele ngomnyaka ka-1986.
Ikutani yekhethu yahlonitjhwe ngonongorwana ngomnyaka ophelileko. Wathatha umhlalaphasi sekamvezi ngomnyaka ka 2021.
Ngu-Aaron Shadow Mbonani, iGanadlha leMaphodlha, Mlotjw’akozingelwako, Mbonani kaMahlokohla owahlokohla iimbila zisemlindini wazo. LiDhlowu liDlanga lifela kude. Leli liDlanga lakakhozana untjhebo ziphalakile. Ngumsongelwa bamsongela bangamboni, nabambonako bamlilizela. Liphimbo leKulungwana, elibukhali laye labamnandi endlebeni zabalizwako!
Ulime kwalimeka, lala uphumule Ganadlha, Mlotjhwa!
