Umtloli ngu Saai Mahlangu.
Umma uThuthukile Kabini we”Gadunga Sigadange-Sivusele isimilo,” uhlonitjhwe ngeziqu zobuPhrofesa yiKara Heritage Institute ngedima ayidlalako ngokuthuthukisa ubukghwari nendabuko yesiNdebele. Waziwakhulu ngemisebenzi yakhe yeNdoni, ubuthelela abantu abatjha abufundise ngendlela yokuziphatha, ukuhlonipha ngendlela ebanzi hlangana nokhunye.
“Ngobukghwari bami, ngithuthukisa abentwana ngokuvuselela abentwana ngesimilo nangekambiso yesiko lesiNdebele. Ngithabe khulu, ngithabe ngazirareka ngathi intwele izanjani kimi. Ekuthomeni khengayisaba ngathuka, kodwana ngakhumbula ukuthi leli libizelo lami. Yinto engabuya nayo emabhudangweni, into engiyinikelwe bobamkhulu ukuthi ngifundise abentwana, ngibabuyisele emva bonyana umntwana womntazana newomsana bakhuliswa njani”, kutjho uPhrofesa Thuthukile Kabini weGadunga Sigadange.
Ngale kwalokho, uyatjho bonyana ufundisa abantu abatjha ngokudla kwesikhethu okunjengerhayi, isidudu, umphohlo kanye netseletsele. Kazi itseletsele ngiyo eyakha iSewula Afrika mazombe.
UPhrofesa Thuthukile Kabini umsunguli weNdoni yamaNdebele esifundeni seMpumalanga, begodu uyatjho bonyana uyalithokozela isekelo nebambiswano lababelethi ekuthuthukiseni isikhethu.
Ngamafitjhani, umma lo ungunaBhuda wenda kwaKabini. Isiphiwo sakhe sirara nabokosozizwe! Akakahluki nodorhodere wesikhuwa nanyana yena asebenza ngokwesintu nje. Wazi uZimu nabeZimu. Ubamba ngezandla zombili, arhuluphalele ukutuhi asize isitjhaba ngezamasiko, ahlathulule namkha ayelelise isitjhaba ngomrhatjho.
Zamvanje ngezithi sele kwenziwe i-documentary ethi “My last Dream”. Okwanje iyafumaneka kuye ngethintano lomoya kanye nange-USB. Lokhu kulitshwayo elikhulu elimenza abengomunye oyikwekwezi ekhanyisa kukhanye nakosozizwe. Ye-ke lokhu kumlando omkhulu esitjhabani samaNdebele.
Zinto zinjalo, i-Kara Heritage kuyihlangano edosaphambili ngokubuyisa isikopilo yomuntu iwuhlanganise nesikhathi sanamhlanje. Yingakho umma uThuthukile Kabini athweswe iziqu eziphezulu zobuPhrofesa. Uthuthukise isitjhaba njengegama lakhe! Ubalwa hlangana nabanye uDhorhodere Nothembi Mkwebane, kanye noDhorhodere Gogo Nostokana Mahlangu. Lokhu kukhumbuza isitjhaba ukuthi kakarela esiphiweni sakho, ekunqgineni uzakuvuna okutjhalileko, uphakamise isibongo sakho ngendlela ekhuthazako.
