UMMA AKABIZWA NGESIBONGO SALAPHO ENDE KHONA
Ngokuvamileko ZIMBILI iindlela zokubiza umma owendileko esiNdebeleni ngilezi:
⦁ Ubizwa ngesibongo sakwabo.
Umma nakabizwa ngesibongo sakwabo sisebenzisa isakhi u(Na) ekusisakhi esiza ngaphambi kwesibongo nofana isinanazelo sakhe. Tjheja bonyana ungwaqa ongumakghadlana u(N) wesakhi u(Na) uba ligabhadlhela akabi liledere elincani. Umnqopho wokuthi umakghana u(N) abe ligabhadlhela kungombana sihlonipha umma loyo ngokumbiza ngesibongo nofana ngesinanazelo sakwabo.
Nangabe umma loyo ngewakwaSkhosana, sitlola: (NaSkhosana nofana NaJali) kuba namagabhadlhela amabili.
Asitloli: (naSkhosana nofana naJali)
Isakhi u(Na) ngiso esisiza bonyana sibize umma loyo ngesibongo nofana ngesinanazelo sakwabo. Nasele uthi (naSkhosana) uyamdelela.
2. Kwesibili, umma ubizwa ngezibulo lakhe.
Umma-ke nakabizwa ngezibulo lakhe sisebenzisa isakhi u (No) ekusisakhi esiza ngaphambi kwegama lezibulo lakhe. Nakilobubujamo ungwaqa ongumakghadlana u (N) wesakhi u (No) uba ligabhadlhela ukutjengisa bonyana sele awubelethele umuzi lo ende kiwo.
Ngibona abanye batlola: (noStokana), ayikho into enje. Umakghana u(N) kufuze aphakame abe ligabhadlhela bese sithi: (NoStokana), ngombana izibulo lakhe nguStokana.
Nangabe izibulo lakho nguVelephi, nofana nguTjhudwana sitlola: (NoVelephi nofana NoTjhudwana)
Kuba namagabhadlhela amabili ungwaqa u(N) neledere lokuthoma legama lomntwanakho ngombana sikuhlonipha ngokukubiza ngezibulo lakho.
Asitjhejeni-ke bakwethu bonyana ngaso soke isikhathi amagama wehlonipho atlolwa ngegabhadlhela.
Nawunomfakela mayelana nekambiso yokubiza umma owendileko, sibawa usithumele umbono wakho ku- [email protected]
