UMEHLUKO PHAKATHI KWESINANAZELO NEEMBONGO

Nangithi “Dlambili” nginanazela umuntu weembongo zakwaMasilela.
Nangithi “Dumako” nginanazela umuntu weembongo zakwaMasango.
Nangithi “Jali” nginanazela umuntu weembongo zakwaSkhosana njalonjalo.
Lokha kade amaqhegu bewathi nakafika emzini, bathome ngokubiza isinanazelo salapho basangena esangweni ngomnqopho wokuhlonipha ihloko yomuzi loyo.
1. Isinanazelo yihloko ejamele isibongo esithileko. Umuntu nasimnanazelako vane simbiza ngehloko yeembongo zekhabo nangokuya kwekoro avela kiyo. 
2. Iimbongo-ke kulapho sele sibeka khona umlando wesibongweso ngokwekoro ethileko.
Nasele ngithi (“Mahlangu Maridili wakoNdamase khondlo lomnthanga, sibongo esingabongwa ebantwaneni sabongwa ebantwaneni siyaridila…”) Lezo ziimbongo zekhethu akusiso isinanazelo. Isinanazelo sithi”Maridili” ekuyikoro yendodana yekhomba (7) kiwo woke amadodana kaMahlangu.
Bese kuba nalabo abathi “isithakazelo”.  Awa bakwethu isithakazelo siZulu akusiso isiNdebele. Ibizo elithi “isithakazelo” lisuselwa esenzweni esithi “thakasa” okutjho ukuthaba. 
Thina NgesiNdebele sithi “isinanazelo” ibizo elithi “isinanazelo” lisuselwa esenzweni esithi”nanazela” okutjho ukuhlonipha.