UKUVEZWA KWAMA-QUEEN NAMA-KING WENDONI ZEENTJHABA ZOKE EMFUDENI EZAHLUKENEKO
Umkhwezeli weNdoni yamaNdebele, umma uThuthukile Kabini ulule umkhonwake kanye nabakhambisani bakhe bahlela imbedla yomnyanya wokuvezwa kwalabo abajamele iintjhaba zabo. Umnyanya lo bewubanjelwe e-SS Guest House engaKwaMhlanga ngomhlaka 25 kuKhukhulamungu 2021.
Imihlobo yoke beyihlangene, nababantu bebabuthene bazokusekela indoni yangekhabo. Indoni yesizwe samaNdebele iyokujamela ngu Simangele Mnguni we Mountaiview, KwaMhlanga oneminyaka emasumi amabili (20) kanye no Thembinkosi Glen Maseko we Tweefontein “H” oneminyaka elisumi nabunane (18).
“Kade lokhu ngikulindile begodu ngifunga ukuthi ngelinye lamalanga ngizowajamela amaNdebele, ngithuthukise nelwazi lami lesikhethu. Ngithokoza ababelethi bami nabantu boke abangisekelako. Ngithi sitjhabasekhethu sekelani umma uThuthukile Kabini njengomdosi phambili weNdoni yamaNdebele,” kutjho uThembinkosi Glen Maseko.
Zinto zinjalo, uSimangele Mnguni ukhamba emagameni womlinganakhe uthi “Indoni isisekelo sabantu abatjha. Ngithi kibontanga zethu sukani ebumnyameni, thathani isifundo kuNdoni begodu balekelani imithwalo ezaba ziinqabo empilweni zenu. Ngifuna ukuthuthukisa isikhethu kufikela emazingeni aphezulu kungakho ngenza iimfundo zami neUNISA,” kutjho uSimangele Mnguni.
“Lokhu kukokuthoma sibanomnyanya omkhululu kangaka. Sikwazile ukuhlanganisa iinfunda zoke endaweni yinye, yoke imihlobo beyijanyelwe nabentwana batjengisa irhuluphelo lokuthuthukisa amasiko wabo kanye nevunulo yabo,” kutjho umma uThuthukile Kabini.
Umnyanya uvulwe ngokuthi kube nokugidinga ekukulapho bekubukiswa ngevunulo negido lemihlobo yoke ngokwahlukana. Emva kwalapho kuvezwe abentwana beNdoni abayokujamela imihlobo yabo. Abakhambele umnyanya lo, hlangana nabanye yimeyara kamaspala weThembisile Hani uMma unaMtshweni ne Kosi uNdabezitha wesigodlo sakwa Nzunza Fene, kanye nomsunguli weNdoni u Dorhodere uNomcebo Mthembu.
