UKUBULUNGWA KOMUNTU OZIBULELEKO.
Umtloli ngu-Sunnyboy Moloko Mtsweni, umtloli nomhlaziyi wesiNdebele
Lalelake! Ngitjho nebhayibhelini imbala akhange khekwamukeleka ukuzibulala komuntu. Ngitjho noJudas owathengisa indodana kaZimu, uJesu wagcina sele azisola khulu ngesenzo sakhe, wabulawa yihliziyo, bewakhamba wayoziphanyeka, kodwana ukuzibulala kwakhe kwamenzela isono esikhulu esiphala lesi sokukhaphela uJesu. (Funda Mathewu 27: 4-5) Njeke nesintwini soke siphelele ukuzibulala kubuhlola. Nawuzibuleleko uSihlola ngesintu nangesiNdebele. Qalake bona bekwenzekani kade lokha nawuzibuleleko: Umuntu ozibuleleko bekanganamgcwabo. Umuntu ozibuleleko nanyana angubaba nanyana angumma bekangahlatjelwa litho, bekangenzelwa nethuna bebamphosela emgodini njengenja efileko. Begodu nesidumbu sakhe besingathintwa mumuntu ngombana bekangabangela umuntu omthintileko loyo umkhokha wokuzibulala. Begodu bebangamngenisi ekhaya ngombana uzokuqeda umndeni lo.
Qalake bona bekwenzekani:
- Umuntu nakazibulalele emangweni
Nabamthola azilengisile phezulu emthini bekungahlatjwa nomkhosi. Kunokulila bebabamba imihlathi bakhuze umhlolo! Bebamkhafulele bathi uhlolile. Abafazi bebangabandameli hlanu kwalapho aziphanyeke khona. Bekufika amadoda womndeni wekhabo afese embe umgodi phasi, ngaphasi kwala alenga khona. Bathi bangemba umgodi loyo, lokha nasele utjhingela ukuya phasi, basike intambo namkha umutja azilengise ngawo lo isidumbu sakhe siwele ngemgodinapho, bamdibizese bese bayalevela bebaqinisekise bona akubi lithuna elibonisako. Bese babeka ilitje nje elimeregako bona wazibulalela la. Nabaqedako bazikhambele babuyele emakhabo. Lokho kutjho ukuthi sekuphelile ngaye. Kusuka lapho akunamuntu ozabe asakhuluma ngaye kube ngasuthi akhange abakhona ephasinapha.
- Umuntu nakazibulalele
Kade bebakghona ukwemba khona ngendlinapho umgodi nawutjhingelako bamphosele ngaphakathi bavale bebasinde benze istupe phezu kwakhe. Abanye bebenza neziko lokubasela khonapho phezu komgodi abamvalele kiwo loyo.
Nawunomfakela mayelana nehlelo lokubulungwa komuntu ozibuleleko, sibawa usithumele umbono wakho ku- Mpumalangapress@gmail.om
