IKAMBISO YOMLOBOKAZI NASELE ENDILE
Umtloli ngu Kumbuza Mahlangu.
1. ISIKWA
Umlobokazi ugayela utjwala apheke nezikwa athwalisane nepelesi ekade impelesele nakasimanje baye emthini la bebahlala khona ngesimanje. Ipelesi iyokuthokoza beze bazoyithwalisa isikwa basise ekhakwakhe lomlobokazi. Kuditjhwa emthinapho bese babuyela kwabo. Akangeni ekhakwakhe umlobokazi mhlokho.
2. UKUBUYISELA AMEHLO
Emva kwamalangana umlobokazi uya ekhakwakhe ayobavakatjhela. Wenza koke ekhakwakhe ngombana vane sele aphathisiwe iimpoto zalapho.
3. UKUPHENDULWA
Umlobokazi kufika lapho anikelwa iintjorholo ezitja. Uhlubula ibhidi eliqobotjhelweko ambathe umtshurhwana omkhulu. Umtshurhwana womlobokazi uhlala ungenzasi kwamahlalo ubuphilo bakhe boke, nakanjalo uphenduliwe.
4. UKWAKHA IINRHODLO
Indlu nasele ibikiwe umlobokazi uphekelelwa bomma bekhabo, bekhabomkhulu nabomakhelana ekhakwakhe. Kulalwa khona ekuseni unosokana ayotjengisa abakhozi ngakwamntwana. Kwakhiwa iinrhodlo phambi kweqathana. Kunehlangothi la kwakha bekhakwakhe nelekhabo. Abodadwabo lomlobokazi bakha iinkhawulana. Emva kwalokho umlobokazi udoselwa ngakwakhe.
Unosokanakhe uyamphekisa ngakwakhe. Uvunyelwa bona sekangapheka ngakwakhe.
5. UKUHLAMBISA / UKUVULA IKORO
Umlobokazi uza nemiseme, iinthebe, imitlhodlho nemithanyelo aphekelelwa bomma bekhabo nabodadwabo azokuhlambisa. Iintundu le uyikhupha ngakwakhe unomyezani ayise ngakosokana ahlambisele abomma bekhakwakhe ngokulamana kwabo. Unosokanakhe uba nomvulakoro nekonyana lakhona.
Mhlokho umlobokazi uza nomkhupha kwabo.
6. IHLANZAMASEKO
Yindlela umlobokazi athokoza ngayo bekhakwakhe ukuthi sekangapheka ngakwakhe. Ugayela utjwala ngemithombo ebuya kwabo apheke nokudla ngakwakhe. Usosokanakhe uzokuza nakhambisana nabo basele bebadle ngakwamntwana. Usosokana akangeni ngendlini mhlanokho.
7. UKUTHIYWA KOMNTWANA IGAMA
Usosokana uza nembuzi azokungena ngakwamntwana. Ungena nabafowabo abodadwabo nabomalume lendodana. Bangena ngeqathaneni bathiye umntwana igama. Bagubulula umlobokazi ngemali / ngezipho bamlotjhise. Imbuzi le ihlatjiswa umlobokazi. Baphiwa izipho kutjengise bona umlobokazi uyabemukela.
8. UKUKHUPHA UMKHONO
Umalukazana akaqakanisi umtshurhwana kwakhe. Unina uthumela abomncayabo bazokubawa kunosokanakhe bamkhuphe umkhono. Ukusuka lapho sekangaqakanisa akhuphe umkhono.
9. UKUHLUTJULISWA
Unina lomlobokazi uthoma ukuya kwamntazana mhlana kunomntwana. Uya kwamntazana ayomhlubulisa aphathele abantwabomntanakhe izipho. Uhlubulisa umntwanakhe ngesipho esithize, kungaba yingubo kuya ngamandlakhe.
Umkhwenyana umhlabisa imbuzi amgubulule balotjhisane.
Ikambiso ingehluka ngokuya ngeendawo abantu abakhe kizo.
Nawunomfakela mayelana nekambiso yomlobokazi nasele endile, sibawa usithumele umbono wakho ku- [email protected]
